COÑECENDO A PENÍNSULA DO BARBANZA
O martes 16 de xuño de 2015,
o grupo de 5º acompañado da titora e da profesora de A.L., fomos de excursión
toda a xornada pola Península do Barbanza.
Saímos do colexio a primeira
hora cara a Noia facendo a primeira parada na Ponte Nafonso para ver a construción medieval sobre o río Tambre e
observar a vexetación do lugar.
Seguimos ata chegar ao Museo do Mar, no casco vello da vila de
Noia. Félix, recibiunos e contounos moitas cousas dos inventores de motor que
houbo nesa terra, curiosidades sobre animais mariños, fósiles e, sobre todo,
quedounos claro que a el lle gusta o mar e que lle encantaría volver á
Arxentina, pero connosco.
A continuación, fixemos un
percorrido polo casco vello da vila. Descansamos e repuxemos forzas na Praza do Tapal (antiga fortaleza na
muralla) e recoñecemos o románico e gótico da igrexa de San Martiño. Aprendemos a diferenciar cantería e cachotería. Vimos o Pazo
Dacosta cos seus catro arcos oxivais, seguimos ata o Curro onde está o Teatro Coliseo, o Antigo Hospital e mailo Pazo
do Forno do Rato. Rematamos a mañá na igrexa de Santa María A Nova, co seu enorme rosetón, a capela con teito en
forma de vieira, as laudas e o seu cemiterio.
Xantamos en Xuño, preto das
lagoas. Puxémonos en traxe de baño e visitamos só a lagoa de Xuño, vimos a duna que a pechaba e a
vexetación que cubre parte da auga. Arrolamos pola area e, por fin, chegamos ao
mar aberto para refrescarnos. Que ondas grandes!, que friaxe!, que divertido!,
que perigo! Pero estivemos xenial xogando na beira agardando polas ondas.
Para facer unha inmersión na
Prehistoria, visitamos o Dolmen de
Axeitos. Que grande é! Non nos podiamos imaxinar o tamaño cando falamos del
na clase. Como nos prestou velo, tocalo, sentirnos trogloditas en certa medida.
Foi unha experiencia nova e ben creativa na que todos participamos.
Merenda e parada en Baroña
para mercar o xeado e despedir o día, o mar... e regresar a Barouta cansos pero
emocionados e satisfeitos pola experiencia vivida.
